– Gjennom åra har det å søkje om midlar, og ikkje minst det å forske saman, bidrege til tette band mellom forskarar og institutt på tvers av fleire institusjonar.
Dette seier Hildegunn Valen Kleive frå Institutt for Religion og livssyn ved Høgskulen i Volda i ei nyheitssak på heimesidene til høgskulen. Saman med Marianne Hustvedt (same institutt) og Lars Julius Halvorsen (Institutt for planlegging, administrasjon og skuleretta samfunnsfag) er ho ein viktig aktør i FAITHED-prosjektet. Volda-teamet har stått for all datainnsamling på Vestlandet, og dei deltar saman med andre FAITHED-forskarar i arbeidet med å analysere materialet og publisere resultata.
Men høgskulen har vore viktig også i utviklingsfasen av prosjektet. Faktisk starta det heile med såkornmidlar frå Høgskulen i Volda, før det etter fire søknadsforsøk endeleg resulterte i løyving frå Forskingsrådet, rett nok til ei kraftig endra utgåve av prosjektet.