English version of this page

Studentane som ønskjer å bli verande i byen

Interesser for spelutvikling og digitalt design førte dei saman i ein tilfeldig by i Noreg – der dei no ser føre seg ei felles framtid. Daniela frå Romania og Aedan frå Australia har forelska seg i Spillskolen, Hamar og kvarandre.

Portrett Aedan og Daniela

Aedan Soellaart og Daniela Mihaela Crudu er eit par som deler dei same interessene og planlegg ei inspirerande framtid. Foto: Ole-André Lagmandokk / INN

Av Hedda Smedbold
Publisert 2. juli 2025 13:10 - Sist endret 22. des. 2025 12:07

– Vi møttest på ein hyttetur arrangert av studentorganisasjonen ved starten av førre semester. Det var så vakkert der, og vi hadde det kjempekjekt – særleg fordi vi fekk spele mange brettspel saman, seier Daniela Mihaela Crudu.

Daniela kjem frå Bucuresti og skulle eigentleg berre vere i Hamar eitt semester som utvekslingsstudent ved Spillskolen. Men etter å ha opplevd kor fint livet i Noreg er – og funne kjærleiken – skal ho no ta ein bachelor i animasjon og digital kunst ved Universitetet i Innlandet (INN).

Eit inspirerande studentliv

– Dei har riktig tilnærming til å undervise i spelutvikling her. Dei fleste eksamenane er prosjektbaserte, og arrangementa er tett tilknytt bransjen. Det er òg fantastiske lærarar her som gir mykje tilbakemelding, fortel Aedan Soellaart.

Daniela og Aedan går gjennom parken
Aedan kjem opphavleg frå eit område utanfor Brisbane i Australia, men flytta til Noreg saman med familien sin for nokre år sidan. Med mål om å gjere hobbyen om til ein karriere, hamna han i vidareutdanninga i Virtual Reality og Augmented Reality i Hamar.

Både Daniela og Aedan føler at dei kreative prosessane blir støtta av Spillskolen, og at dei vil vere godt førebudde på å jobbe i bransjen etter at dei er ferdige med studia.

– I Romania seier dei fleste professorane berre korleis dei vil at prosjekta skal vere, og dei snakkar nedlatande til deg om du gjer noko annleis. Hierarkiet mellom tilsette og studentar er veldig tydeleg. Her ved INN er dei tilsette så snille og hjelpsame, og dei gir deg rettleiing slik at du kan skape dei produkta du brenn for, forklarer Daniela.

Vis bildeoversikt Lukk

Alt skjer i Hamar

Studentane ved Spillskolen er med på alle slags kreative prosjekt saman, og både skulen og studentorganisasjonane arrangerer ulike arrangement gjennom året, til dømes Game Jams og Game School Expo.

– Dani og eg oppdaga raskt at vi likar å jobbe saman òg. Vi elskar å jobbe med kule, kreative prosjekt, og vi elskar spel. Så vi tenkte: Kvifor ikkje starte eit firma saman? Dani er kunstnar og eg er programmerar, så vi er litt som yin og yang,» forklarer Aedan.

Aedan og Daniela sit foran dataskjermane sine med spel
Det er ikkje uvanleg at spelstudentar ved INN startar eigne selskap og jobbar med prosjekt ved sida av studia. Hamar er den perfekte staden for dette, ettersom byen ligg nær store aktørar i bransjen.

– Vi snakkar om å bli buande her etter at vi er ferdige ved Spillskolen då vi likar Hamar veldig godt. Naturen er vakker, og i tillegg ligg det så nære både Oslo og flyplassen, seier Aedan.

– Hamar er ein vakker og roleg by. Det er ikkje for stort, men heller ikkje for lite. Og du kan gå overalt, noko som gjer det veldig enkelt å ha eit sosialt liv, held Daniela fram.

INN er svært glade for å ha så dedikerte studentar som bidreg til universitetsbyane våre, og vi er alle spente på å sjå kva framtida bringer for Daniela og Aedan.

Les meir: